दशरथकृत शनि स्तोत्र

नमः कृष्णाय नीलाय शितिकण्ठ निभाय च । नमः कालाग्निरूपाय कृतान्ताय च वै नमः ॥ १ ॥ नमो निर्मांस देहाय दीर्घश्मश्रुजटाय च । नमो विशालनेत्राय शुष्कोदर भयाकृते ॥ २ ॥ नमः पुष्कलगात्राय स्थूलरोम्णेऽथ वै नमः । नमो दीर्घाय शुष्काय कालदंष्ट्र नमोऽस्तु ते ॥ ३ ॥ नमस्ते कोटराक्षाय दुर्नरीक्ष्याय वै नमः । नमो घोराय रौद्राय भीषणाय कपालिने ॥ ४ ॥ नमस्ते सर्वभक्षाय बलीमुख नमोऽस्तु ते । सूर्यपुत्र नमस्तेऽस्तु भास्करेऽभयदाय च ॥ ५ ॥ अधोदृष्टेः नमस्तेऽस्तु संवर्तक नमोऽस्तु ते । नमो मन्दगते तुभ्यं निस्त्रिंशाय नमोऽस्तु ते ॥ ६ ॥ तपसा दग्ध-देहाय नित्यं योगरताय च । नमो नित्यं क्षुधार्ताय अतृप्ताय च वै नमः ॥ ७ ॥ ज्ञानचक्षुर्नमस्तेऽस्तु कश्यपात्मज-सूनवे । तुष्टो ददासि वै राज्यं रुष्टो हरसि तत्क्षणात् ॥ ८ ॥ देवासुरमनुष्याश्च सिद्ध-विद्याधरोरगाः । त्वया विलोकिताः सर्वे नाशं यान्ति समूलतः ॥ ९ ॥ प्रसादं कुरु मे सौरे वरदो भव भास्करे । एवं स्तुतस्तदा सौरिर्ग्रहराजो महाबलः ॥ १० ॥