ऋणहर्ता गणेश स्तोत्र

॥ अथ स्तोत्रम् ॥ सृष्ट्यादौ ब्रह्मणा सम्यक्पूजितः फलसिद्धये । सदैव पार्वतीपुत्रः ऋणनाशं करोतु मे ॥ १ ॥ त्रिपुरस्य वधात्पूर्वं शम्भुना सम्यगर्चितः । सदैव पार्वतीपुत्रः ऋणनाशं करोतु मे ॥ २ ॥ हिरण्यकशिप्वादीनां वधार्थे विष्णुनार्चितः । सदैव पार्वतीपुत्रः ऋणनाशं करोतु मे ॥ ३ ॥ महिषस्य वधे देव्या गणनाथः प्रपूजितः । सदैव पार्वतीपुत्रः ऋणनाशं करोतु मे ॥ ४ ॥ तारकस्य वधात्पूर्वं कुमारेण प्रपूजितः । सदैव पार्वतीपुत्रः ऋणनाशं करोतु मे ॥ ५ ॥ भास्करेण गणेशो हि पूजितश्छविसिद्धये । सदैव पार्वतीपुत्रः ऋणनाशं करोतु मे ॥ ६ ॥ शशिना कान्तिवृद्ध्यर्थं पूजितो गणनायकः । सदैव पार्वतीपुत्रः ऋणनाशं करोतु मे ॥ ७ ॥ पालनाय च तपसां विश्वामित्रेण पूजितः । सदैव पार्वतीपुत्रः ऋणनाशं करोतु मे ॥ ८ ॥ इदं ऋणहरस्तोत्रं तीव्रदारिद्र्यनाशनम् । एकवारं पठेन्नित्यं वर्षमेकं समाहितः ॥ ९ ॥ दारिद्र्याद्दारुणान्मुक्तः कुबेरसम्पदं व्रजेत् । फडन्तोऽयं महामन्त्रः सार्धपञ्चदशाक्षरः ॥ १० ॥ ॐ गणेश ऋणं छिन्दि वरेण्यं हुं नमः फट् । इमं मन्त्रं पठेदन्ते ततश्च शुचिभावनः ॥ ११ ॥ एकविंशतिसङ्ख्याभिः पुरश्चरणमीरितम् । सहस्रावर्तनात्सम्यक् षण्मासं प्रियतां व्रजेत् ॥ १२ ॥ बृहस्पतिसमो ज्ञाने धने धनपतिर्भवेत् । अस्यैवायुतसङ्ख्याभिः पुरश्चरणमीरितम् ॥ १३ ॥ लक्षमावर्तनात्सम्यग्वाञ्छितं फलमाप्नुयात् । भूतप्रेतपिशाचानां नाशनं स्मृतिमात्रतः ॥ १४ ॥