जय जय त्र्यंबकराज

जय जय त्र्यंबकराज गिरिजानाथा गंगाधरा हो । त्रिशूल पाणी शंभो नीलग्रीवा शशिशेखरा हो ॥ वृषभारुढ फणिभूषण दशभुज पंचानन शंकरा हो । विभूतिमाळाजटा सुंदर गजचर्मांबरधरा हो ॥ धृ ॥ पडलें गोहत्येचें पातक गौतमऋषिच्या शिरी हो । त्याने तप मांडिले ध्याना आणुनि तुज अंतरी हो ॥ प्रसन्न होऊनि त्यातें स्नाना दिधली गोदावरी हो । औदुंबरमुळी प्रगटे पावन त्रैलोक्यातें करी हो ॥ जय ॥ १॥ धन्य कुशावर्ताचा महिमा वाचे वर्णू किती हो । आणिकही बहुतीतें गंगाद्वारादिक पर्वती हो ॥ वंदन मार्जन करिती त्याचे महादोष नासती हो । तुझिया दर्शनमात्रे प्राणी मुक्तीतें पावती हो ॥ जय ॥ २॥ ब्रह्मगिरींची भावें ज्याला प्रदक्शिणा जरी घडे हो । तैं ते काया कष्टें जंव जंव चरणी रुपती खडे हो ॥ तंव तंव पुण्य विशेष किल्मिष अवघें त्याचें झडे हो । केवळ तो शिवरुपी काळ त्याच्या पाया पडे हो ॥ जय ॥ ३॥ लावुनिया निजभजनी सकळही पुरविसी मनकामना हो । संतति संपत्ति देसी अंती चुकविसी यमयातना हो ॥ शिव शिव नाम जपता वाटे आनंद माझ्या मना हो । गोसावीनंदन विसरे संसारयातना हो ॥ जय ॥ ४॥